Le Soleil - 服務糟蹋了食物及環境

多謝支持!!! 呢個blog已經搬家啦~ 麻煩閣下稍移玉click至

http://www.diningexperiences.net/

新既blog會有齊舊既文章 (Summary part), 當然仲會不停發放新既review啦, 而且~

相更靚,

排版更好,

內容更豐富~

唯一不變, 文章依然好很漫長~!! 感謝支持!!!

Restaurant Info:

Cuisine: Vietnamese

Ranking: ~

City: Hong Kong

Tel: +852 2733 2033

Address: 3th Floor, The Royal Garden Hotel, Kowloon, Hong Kong

Website: http://www.rghk.com.hk/dining-en.html

Dining Info:

Date: 24^th September, 2015

Time: 7:30p.m. to 9:30p.m.

Meal: Dinner

Pax: 2

With: A. Wong

Price: HK$850
  - Food: HK$615

  - Beverage: HK$140

  - Service Charge: 10%

Le Soleil 越南餐廳最出名係佢既炸牛腩同靚環境, 而且價錢親民.

在下其實黎過呢間餐廳已不下十次, 雖不會再有驚喜, 但貪其食物味道大眾化 (每次同朋友黎佢地都讚), 加上坐得舒舒服服, 同埋友善既服務, 這幾年成為了在下的飯堂. 真心說話: 如果同想4,5個朋友坐得舒舒服服食餐飯傾下計, 這裏是不二之選.

從酒店大堂上電樓梯到食自助餐既雅苑座, 拐右上多一條短樓梯就到逹越南餐廳. 被安排坐係靠牆帳篷下既小枱, 甚有異國風情. 同樓下既自助餐雖只是一層之隔, 但環境卻是天壤之別... 在下唔明點解樓下可以有食客接受到坐係電樓梯隔離食野...(琟苑座...何來雅...?) 

呢間越南餐廳唔會屈你飲礦泉水, 除非指明, 否則只會供應tap water~ 

FOOD AND COMMENTS:

Menu: A La Carte

蝦片

甫坐低, 侍者即時奉上好好味既蝦片, 夠脆又好味道, 友人十分喜歡, 都未睇menu已經清左一兜, 即刻再encore. 睇過幾份餐牌, 我們決定散叫~

1^st Dish (Starter) : Appertizer Combination (spring roll, pan-fried shrimp cake, rice paper roll with pork fillet, steamed rice flour pouche, and cabbage & chicken salad (for 2 persons) 越式拼盤 (春卷, 越南蝦餅, 燒豬柳米紙卷, 越式蒸粉包, 牙車快沙律)

Price: $238

每次同朋友黎食飯都必定會叫呢個, 因為一次過可以試齊大部分前菜. 拼盤跟一個辣醬同魚露. 以前上呢個醬都會俾2隻小羹, 但今次服務失準, 得一隻…扣分… 酒店餐廳, 2款醬2隻羹係常識吧, 咁小既事也做不好, 失望. 

拼盤內所有食物既質素都能保持水準. 先食米紙卷, 特別之處在於佢先用塊米紙包住塊紫穌葉, 然後先包餡料, 食落口塊紫穌葉散發出既淡淡清新味道, 喚醒晒味蕾. 米紙卷依然夠薄~

春卷, 同樣包住好多配料, 所以味道會較為複雜, 用塊生菜包住春卷, 冇咁熱氣, 加埋魚露汁, 好味道, 又係不容錯過!

跟住食粉包, 塊”粉皮”又係好薄~ 裏頭除了有切碎左既豬肉, 蝦乾,仲有好多配料, 又係值得推介!

最後食蝦餅, 蝦味濃, 炸/煎得夠金黃, 而最緊要係D蝦膠打得夠實, 是街外少見的高質. 而食咁多濃味既野食之間, 可以食下酸酸昧昧既牙車快沙律refresh一下! (牙車快沙律者係雞絲沙律)

強烈推介呢個拼盤, 2個人既話, 食晒都5,6成飽, 叫多一個主菜/ 湯粉就可以回府. 價錢都只係$238, 又抵又好食!

2^nd Dish (Main Course): Crispy Beef Brisket in curry Sauce 脆皮咖喱牛腩 + Garlic Bread 蒜蓉包

Price: $198 + $20

呢度既名物, 在下永遠叫佢做咖喱炸牛腩~ 廚師特登用上帶肥既牛腩 (有幾件直情係一半肉一半雪白既肥膏), 所以食落好香牛味 (肥膏...既味道), 而且肉質好淋 (因為近肥嘛), 加埋塊薄薄既脆皮, 未點咖喱汁就咁食都好好食!

通常D人都係喺呢度菜淋上咖喱汁, 但咁做會整淋左塊脆皮, 所以最佳食法係~ 用筷子夾起一舊牛腩, 一野浸落D咖喱汁度, 跟住即刻拎番上黎放落口. 咁做就能保留到脆皮效果, 仲可以掛埋D咖喱汁.

咖喱汁徧甜, 帶微辣, 少許椰汁, 杰身質地, 落左唔少香料, 所以係好香的! 啱晒在下呢D怕辣既人~ 咖喱同牛腩本身係好朋友, 兩者加埋順理成章更好食~

配埋個蒜蓉包, 食法又係一野浸落咖喱汁, 然後極速拎番上黎. 味道又甜又辣又帶少少咸, 咖喱香同蒜蓉香溝埋一齊, 無以上之!!!

其實如果人多既話, 強烈建議點一個白飯/ 椰汁飯 (唔知有冇), 咖喱脆皮牛腩飯, 一定好好好味到暈! 最佳comfort food!

唯一不好的, 就係2個人食呢道菜... 都幾濟...食完差唔多飽到上心口.

3^rd Dish (Dessert): Layer Cake 拉耶糕

Price: $65

拉椰糕, 究竟佢係泰國野定越南野, 定其他國家, 似乎大家仲未有定案, 而在下都唔深究了, 最緊要好食. 呢個拉椰糕好實淨, 又好痴笠笠 (成日痴住左隻碟), 但放左落口又OK wor...幾驚佢痴實個口, 配上椰汁Cream (相中白色一pat pat果D). 椰香加埋本身既班蘭香, 帶微甜, 一道簡單而好味既甜品!

但加埋椰汁既佢, 都幾有份量, 加上之前食左既牛腩, 在下食左一件都收了skin... 友人竟然食到2舊半~佩服!!

4^th Dish (Dessert): Sticky Rice with Banana 糯米配香蕉

Price: $70

又係一道非常簡單的甜品 (但應該比拉椰糕難少少既), 蒸好既白糯米包住條香蕉, 上面曬上花生碎, 食果陣時又係加埋椰汁Cream. 椰汁加香蕉既甜味, 竟然係一個不錯既組合. 笠痴痴既糯米包住半溶既香蕉, 好彩加左最面層既花生粒, 成件事既質感當堂好晒. 

無奈地, 在下同友人已飽到上心口, 糯米呢樣野, 都係少食多滋味, 所以每人都係食左一舊~ 唉...對不起, 做了大嘥鬼...眼闊肚窄了...

Beverage: Vietnam Coffee 

Price: $70

就算冒住今晚訓唔著呢個危險... 點都要order呢杯 - 越南滴滴咖啡. 上枱果陣時已滴好半杯, 之後滴多3至4分鍾就飲得. 呢個係在下飲過最好飲既越南咖啡, 咖啡香濃, 但果香更濃, 淨係聞都係一種享受. 第一口飲到既係咖啡之苦, 隨即湧上淺薄既果甜, 最後帶出超強回甘. 倘若有人飲過比這裏更好的越南滴滴咖啡, 請賜教, 因為在下還未找到...

呢杯咖啡跟左煉奶, 不過在下怕甜, 而咖啡本身既果甜都夠晒, 食得甜既朋友不妨落少少, 風味應該更佳.

OVERALL COMMENTS:

FOOD AND DRINK: 

食物無疑地出色, 尤其係越式拼盤同名物-咖喱脆皮牛腩, 其他地方實在不易搵到. 至於杯咖啡, 更加係出色之作, 單是為它, 已值得繞道前往這裏. 

如果得2-3人黎食既話, 叫佢地D Set Dinner會比較划算, 每位四百幾, 包前菜拼盤, 主角(有3樣, 每樣份量都細細份), 一碗粉, 加埋一個甜品, 份量剛好. 我地2個人, 食散叫, 基本上食完個牛腩都已飽到不行了..

不過要注意set menu係用唔到任何信用卡優惠, 都儲唔到asia miles.



ENVIRONMENT: 

餐廳係酒店中庭閣樓, 樓下就係出晒名抵食既自助餐The Greenery.  

不過當日餐廳都幾full, 加上有2枱大枱, 同埋樓下既滿晒座既自助餐, 另到成餐飯都有少少嘈, 但還是在可接受範圍內. 而在下今次坐左係station側邊, 有時電話嚮同出菜時都會有少少滋擾, 或多或少都有D影響. 幸好餐廳中央有D流水擺設, 令人心平氣和.

值得一讚既係枱同枱之間都好Spacious, 空間感足夠, Soft倚都好舒服! 所以話, 呢度最啱係幾個朋友約埋出黎食餐飯傾下計.

(取自餐廳網頁)

SERVICE: 

餐廳以往既服務, 也是這裏的亮點之一, 專業, 友善, 細心... 但今天唔知發生咩事, 明顯地成班service team 全部落晒形, 三魂唔見七魄. 一位男侍者落完單冇收menu...而上次serve過在下既其中一位女侍者, 以往十分好笑容, 又會主動介紹食物, 今日完全跌晒Watt...收起晒微笑, 問佢問題又支吾以對...這是什麼料子...

最大失誤位(嚴重扣分位) 係其中一個經理, 坐低左5分鍾連水都冇杯, 問佢拎兩杯水, 佢話請等一下, 叫佢寫單, 佢話請等一下, 最後都冇理到我地...我地最後搵左第二位待者 (以前絕對不會發生) 在下對此感到十分失望.

想引用黃子華金句: 你已經唔係好似以前咁啦... 

呢度係在下其中一間十分欣賞的一間餐廳, 在下會再來, 但希望下一次服務可以返回原形, 否則下一次將是最後的一次...



WORTHINESS: 

如果叫Set Dinner會抵D, 但這個價錢已不錯, 加上又可以儲到asia miles, 又冇屈人飲貴水, 咁既環境, 可以靜靜地舒舒服服食餐飯傾下計, 良物又好, 這個價錢已抵了
有心黎試呢間餐廳既朋友, 推薦佢地既lunch, 仲抵! 野食差唔多! 



在此謝謝友人賞臉呢餐飯, 願我們下一餐飯在新加坡食!

RATING: 

Food: 32.25/40
Environment: 27.5/30
Service: 22.75/30
Minus: -5 (Promise Break)
Bonus: Nil

Total: 77.5/100
Ranking: C+
Come Back? One more time 

Felix - 食物人人彈, 終找到原因

多謝支持!!! 呢個blog已經搬家啦~ 麻煩閣下稍移玉click至

http://www.diningexperiences.net/

新既blog會有齊舊既文章 (Summary part), 當然仲會不停發放新既review啦, 而且~

相更靚,

排版更好,

內容更豐富~

唯一不變, 文章依然好很漫長~!! 感謝支持!!!

Restaurant Info:

Cuisine: Modern European

Ranking: ~

City: Hong Kong

Tel: +852 2696 6778

Address: 28th Floor, The Peninsula Hotel, Kowloon, Hong Kong

Website: http://hongkong.peninsula.com/en/fine-dining/felix

Dining Info:

Date: 18^th September, 2015

Time: 8:00p.m. to 11:00p.m.

Meal: Dinner

Pax: 2

With: T. Hon

Price: HK$2,418
  - Food: HK$1,521

  - Beverage: HK$698

  - Service Charge: 10%

Felix餐廳聞名全港, 出名兩樣野: 食物難食 同 男廁尿兜 

今次黎呢度, 明知會被狠狠敲一筆, 但無奈在下真係好想驗證呢兩樣野係唔係真, 所以~ 多謝友人請客, 為在下的求證精神付上沉重代價. 至於結果如何? 請看下去~

<服務失準小插曲>

訂了八點, 早到左半個鍾, 侍者話張枱未Ready, 問我地介唔介意轉第二張. 心諗既然留左張好枱俾我地, 橫掂都係半個鍾者, 咪等囉... 然後諗住去餐廳酒吧飲杯野kill下time, 但上到去已經full到不行, 落番地庫既salon de ning, 又俾人包左場, 唯有去附近既sogo行個圈. 

八點打去餐廳問張枱ready未, reception叫在下等一陣, 然後hold住條電話線, 一等就等左2分半鍾, 一間五星級酒店餐廳, sorry, this is a severe service failure point, 扣分!

跟住餐廳電話就一直打唔通了, 所以直接踩上去算. 唔係window seat唔緊要 (雖然request左...), 但都唔駛俾張面壁既枱我地吧....對正餐廳Service Station條柱, 仲要用一塊白色curtain遮住, 成幅牆咁款...在下明白餐廳既三刹位總要有人坐, 但在下其實早於一個月前已訂位, 加上...侍者一開始既說話, 從而產生期望落差, 扣分啊!!!

不過, 枱同枱之間倘算闊絡, 亦坐得舒舒服服, 同時明白發脾氣也無補於事, 更無謂在友人請客的飯局上發難, 加上今日心情大好, 作罷~ 收拾心情開開心心去享受美食.

今晚星期五, 雖然餐廳Full House, 但一D都唔覺得嘈 (在下估計主要因為外國客佔多, 內地客好像一個也没有...噢...對不起, 崇洋媚外了...噢噢...對不起...在下就是這樣的~), 全宇宙都不會高談闊論 (就算係大枱都好寧靜, 細細聲講, 靜俏俏用餐), 完全感受到呢班係有修養既客人. 

或許, 這就是半島酒店最厲害既地方, 連最難控制既野都可以manage - 客人質素. 

坐低之後, 派了ipad menu, 呢個menu真方便, 按落個餸名就有相睇, 不過可改善既地方係..D食物相可唔可以影靚少少, 影到D野食唔多吸引...(哈哈, 似乎個攝影師同在下既技術都不遑多讓)

Food and Comments:

Menu: A La Carte

Bread

面包有兩款, Sour Dough 同 Foccacia, 兩者都係微暖, 尤以後者更軟熟更香.

值得一讚既係搽面包既佐料. 一籃就只有4個面包, 郤提供了橄欖油, 牛油, 及自家製既醬 - 橄欖加Anchovies加蒜頭既混醬. 呢個醬的確很不錯, 香味十足, 愈食愈開胃, bread basket 前後都refill 左兩次...淨係食面包都飽左一半.

1^st Dish - Friend (Starter) : Lobster Consomme with Herb Croquette, Poached Lobster and Barley Risotto

Price: $205

友人的龍蝦湯, 在下就無緣試飲了, 不過友人大讚好味. 街外大部分龍蝦湯都係cream base, 而呢個係consomme 清湯, 幾特別. 底下跟左D大麥同龍蝦粒. 而最上放左一粒包有香料既炸波波 (croquette).

2^nd Dish (Starter) : Pan-seared Hokkaido Scallop with Lime-agan Oil Dressing, Pumpkin Puree, Pomelo, Lobster Powder, Confit of Fennel

Price: $225

煎北海道帶子, 竟然有3隻咁多, 而且全部都好大隻!!! (不似五星級酒店風格...有質無量...哈) 唔知廚師係咪特登造成以下既效果: 帶子没有了平時所追求的外脆內半生, 溏心的質感不見了, 因為呢隻帶子起碼都7-8成熟, 卻因此而更有咬口, 而透過咀嚼, 令帶子本身既鮮甜更加出. 不過真係唔知是否有心哉花花不開, 無心插柳柳成蔭~

配菜主要有清爽既茴香 (面頭一塊塊果D), 好甜好滑既南瓜蓉, 同埋柚子粒. 成道菜既感覺十分清新, 汁醬亦帶微酸, 好開胃! 作為一個前菜, 盡了應有的本份!

睇番menu, 其實菜式裏仲有些微既龍蝦粉做簡單調味, 不過如果冇提的話都難以察覺.

3^rd Dish (Main Course): "Laundry" Roasted French Pigeon Breast and Braised Leg, Sauteed Bacon and Spinach, Poached Watermelon Raddish, Bacon Foam, Sliced Parma Ham

Price: $385

第一個主菜, laundry - 洗衣! (廚師真係好努力去貼題) 

主角Pigeon鴿肉, order左medium rare, 出黎變了medium, 味道屬中上水平, 尚算嫰滑, 另外還有兩小舊既鴿腿, 用鴿皮包住, 一咬落去就咇晒D油香出黎~正~ 

Pigeon 鴿肉 - 一樣極難整得好食既食材, 至今為止, 就只有新加坡既Restaurant Andre做得另人驚嘆.

呢個洗衣機(大碟)裏面除左鴿, 仲有好多"衫", 有兩塊好滑既雲吞皮 (是模仿"底衫" 嗎...哈哈), 用黎包住波菜食, 波菜黑色一箸箸 (是黑色長襪嗎?...抱歉...這就是在下的想像力...), 仲有用西瓜汁煮既白蘿蔔 (肥皂???), 最後加上作簡單調味的煙肉Foam (連洗衣機洗衫時既泡泡都諗埋, 好野!)

伴碟仲有個 "晾衫架", 晾住既係一塊巴馬臣芝士脆脆同蘿蔔乾. 2個"洗衫桶"裏面分別有塊"洗衫板"- 烘乾了的Parma Ham, 同埋隔離既"洗衣粉" - 用松露油造成既粉末, 香到不行!

老實說, 呢道菜既味道並不驚人, 卻製造到為數不少的亮點, 玩味十足~ 主廚為切合洗衣呢個主題而所下既心機, 實令人感動! 日本人即是日本人, 咁都俾佢諗到. 不過在下幾想知道, 究竟有雞先定有蛋先, 有菜名先定有菜式先~?

4^th Dish (Main Course): Roasted American Beef Tenderloin with Mustard Sauce, Caramelized Onion, and Sweet Corn Coulis, Deep-fried Sweet Potato Gnocchi

Price: $390

Tenderloin, order了medium rare, 出黎又係medium, 剛剛好 (其實在下喜歡食Medium多D, 但每次落單都必叫medium rare, 因為大部分餐廳都會唔覺意整熟左少少).

中規中矩的菜式. 牛扒十分易切, 只是稍為有點鞋口. 配上了芥末汁同粟米thick sauce, 也加了上菜時淋上去的Gravy(肉汁), 令菜式更為惹味. 簡單黎講, 就係一件幾好食既牛柳.

配菜有小洋蔥, 炸番著片, 同炸番著波. 味道不俗, 不過如果個洋蔥可以去多少少衣就好了... 

5^th Dish - Friend (Dessert): Guanaja Chocolate and Madagascar Vanilla Cream Ball, Lavender Ice-Cream, Chocolate Biscuit, Madeleine

Price: $158

朱古力甜品, 日本人廚房裏面最有保證的菜式必然為甜品, 絕少失手, 這裏也不例外, 加上朱古力係半島酒店既強項, 試問呢個甜品點會輸?

先講薰衣草雪糕, 最令人眼前一亮...其花香濃度之高, 尤如把一束薰衣草花直接放落口.

雖是友人的甜品, 在下也偷食了幾啖, 朱古力味十分濃郁, 那種可可香濃, 加上杰身得黎又好滑既感覺, 實在很難在其他地方找到, 推介!

6^th Dish (Dessert): Mango Pudding with Litchi and Coconut Soup, Sansho Pepper, Coconut Mousse, Pomelo, Almond Crumble, Mango Sherbet, 

Price: $158

此甜品是這裏的Signature Dessert, 也是Tasting Menu裏面的甜品菜式. 底下有芒果布甸, 芒果芭菲, 柚子, 杏仁碎, 上面紅色果塊係raspberry脆脆, 仲有幾塊山椒葉. 另配上了荔枝同棷子汁, 臨食前倒埋落去, 將脆脆整碎, 然後撈兩下, 搞掂~

由於材料眾多, 味道同口感都十分複雜 , 雖然如此, 也能夠食得出每種材料及材料之間既融洽. 柚子係某程度上平衡左芒果布甸同芒果芭菲既甜度, 棷子香同荔枝香係十分夾的, 底下既混合物因為有了杏仁碎同raspberry脆脆, 不會只有一pat pat 既感覺, 而份量最少但扮演著十分重要既角色 - 山椒葉, 提供了氣味上的衝擊, 令複雜更加複雜.

不愧為signature 甜品, 侍者介紹甜品時也極力推介.

Petit Four

甜品盒一開三, 最面層(者係圖中最右面)有raspberry Lemon Tart,  Blueberry madeleine.
底下既係海鹽蝴蝶酥, 麥芽糖曲奇.
最後既係薰衣草朱古力.

每樣都不錯, 不會像其他餐廳既petit four般甜到喊, 呢度有酸, 有咸, 有甜, 順序食落去, 好好的鋪排. 值得一讚既係薰衣草朱古力, 薰衣草味好出好香, 而花香也帶出濃郁既朱古力味道, 再一次強調, 半島朱古力從來不會輸.

Wine: Red Wine (Mendel Malbec 2012 - Argentina - Mendoza) 

Price: $590 per bottle

係五星級酒店餐廳叫酒, 等於係身上戒幾刀, 血就點都要流, 睇下你戒邊度流幾多血. 友人跟在下都想飲紅酒, ipad menu既wine list都分好晒國家, 寫埋tasting note. 小弟呢D飲酒經驗尚淺既人類, 都知法國紅酒應該冇死, 不過最平果枝都成9百幾, 雖然唔係在下請客, 但總不能食左人地隻車...

之前係Gaucho Restaurant (Dining Review 在此) 飲過Argentina 既Malbec 都不錯, 這裏都有, 而且價錢算幾親民. 乾脆要一枝吧.

2012年, 飲落都幾smooth, 很不錯, 在下不才, 仲未十分識得欣賞一枝紅酒, 什麼tannin, acidity, tannin, full bodied, 每樣對番住個tasting note 都試到, 總之就不錯啦, 無謂在此班門弄斧... 唯獨酒過三巡, 味道顯然開始變得失色了...

醉翁之意不在酒, 在乎同邊個飲, 難得同好朋友對酌, 哪怕是惠康30蚊枝既貨色, 都肯定比跟老闆對酌時既靚紅酒更會飲得開懷~

友人去到後期都不勝酒力, 連半島酒店既招牌咖啡都未飲就打道回府了. 估不到餐飯(3個courses而已)竟然又係食左三粒鍾! 對於友人同在下, 都好滿意, 最緊要食得開心. 其實, 有時一餐飯, 同邊個食, 比起食D咩, 邊度食, 更為重要. 

這間餐廳十分值得一試, 在下也會帶朋友再來, 不過可能黎食下甜品飲杯酒更好, 始終食物不是這裏的亮點~

在此再向友人道謝, 餐飯咁貴, 謝過了! 下一次輪到在下!

Overall Comments:

FOOD AND DRINK: 

食物中規中矩. 你話好好食, 一定唔係, 同星星餐廳著實有點距離, 但你話難食咩, 又絕對不是. 但點解咁多人會彈呢? 

一切源於~不相符~ 呢度既環境同服務實屬超班水平, 水準之高在香港也難找到其他餐廳匹敵. 而呢度既食物只屬中上, 很多時候, 係咁靚既裝修同咁好既服務之下, 難勉會對食物有很高的期望, 從而產生期望落差, 如是者, "出名唔好食" 就係咁黎.

食物質素喺一篇食評裏面係主角, 若然唔好食的話, 一切也是徒然. 
但對於在下所寫的用餐體驗, 食物本身只是佔了大約三份之一的席位, 所以此期望落差並不會影響評分太多.



ENVIRONMENT: 

餐廳裝修由知名設計師 Philippe Starck (其實在下都唔知係邊個, 不過應該係勁野), 餐廳主要分成四個部分, 第一個係reception area, 樓上有兩個Bar Area, 下面係private rooms for 摸下酒杯底, 第二個係main dining area (下面幅相). 第三個就係dining area再入既stage area (cocktail area), 有幾張餐枱同一張長長既bar 枱 (以前好似話唔知逢星期幾, 張bar枱會化身成天橋, 俾人行cat walk), 而在下今次就係坐喺呢個area, 其實都係一件好事, 客人唔多, 靜DD. 

餐廳設計十分前衛, 空間感十足, 而長長bar 枱後既白色波浪牆, 係燈光既配合下, 真係好似一幅識郁既波浪, 實令人賞心悅目~

其中一個裝修設計上既大疑問, 喺在下既不恥下問終於解開. 擁有住全香港最靚夜景既餐廳, 點解要落簾??? 侍者答係因為...."設計"....頂....當聽到咁既答案, 在下爭少少就本能反應地爆出一句...X.... 不過, 佢都好識趣, 知道在下不會滿足於此...遂解釋道, 其實最主要既原因係唔想客人太focus喺個夜景度, 故落簾, 只有放煙花既日子才會拉開, 設計師希望客人將更多注意力集中喺番餐廳既設計裏面. 原來如此....sor des nei~ 

至於餐廳的第四個部份: 廁所~

男廁, 名不虛傳, 去尿尿時著實有種大地在我腳下的感覺. 但由於洗手間裏面已經貼上指示牌 - "為保障客人私穩, 請勿拍照"... 而在下亦唔想成為一個失德既食客...請恕在下無法把這個"遠近馳名"的尿兜在這裏公諸同好, 還望大家能夠親臨試用, 哈哈~

老實說, 以尿兜黎講, 男生好應該黎呢度試一次...餐飯都係其次...

(取自餐廳網頁)

SERVICE: 

餐廳服務, 若論侍者既專業水平, 態度, 禮貌, 細心, 笑容, 這裏的確首屈一指, 去過咁多間餐廳, 還未有一間可以媲美這裏. 

而其中一位鬼佬(唔知係餐廳經理定侍酒師), 其服務水平更可以用"教材式服務"來形容, 佢無論係任何時候都會保持笑容 (包括係餐廳行走時), 佢侍酒時都會順道講解一下枝酒既特性, 介紹得專業既同時, 又會搞一兩句gag, 認真專業得黎俾到人一種好平易近人既感覺. 所謂見微知著, 以小見大, 食主菜時在下問佢拎多一隻叉, 正常侍應會直接俾隻叉你, 加多句here you are, 好D既會將隻叉放落枱, 而佢, 在下親眼見住, 拎左隻細碟, 上面放塊napkin, 再放隻叉上去先遞俾在下...很小的事, 卻很窩心, 十分impressive.

唯一可彈的, 就係埋單時等得有點耐, 同埋應該搞錯左張單, 但由於是友人付錢, 在下一概少理. 

WORTHINESS: 

6個dish, 一枝酒, 一枝水, $2400, 如果淨係計食物既, well, 還可以啦. 但如果計埋環境同服務, 這個價錢就超值了. 畢竟, 黎呢度係主要食名氣的, 半島酒店, 憑呢四個字, 已值回票價.

在此, 再向友人致謝!

Rating: 

Food: 34/40
Environment: 29/30
Service: 30/30
Minus: -3 (Call Waiting), -3 (Bad Table Arrangement)
Bonus: +5 (Excellence Service)

Total: 92/100
Ranking: A
Come Back? May well be

NUR - Noma 影子, 營養餐單

多謝支持!!! 呢個blog已經搬家啦~ 麻煩閣下稍移玉click至

http://www.diningexperiences.net/

新既blog會有齊舊既文章 (Summary part), 當然仲會不停發放新既review啦, 而且~

相更靚,

排版更好,

內容更豐富~

唯一不變, 文章依然好很漫長~!! 感謝支持!!!

Restaurant Info:

Cuisine: Innovation

Ranking: ~

City: Hong Kong

Tel: +852 2871 9993

Address: 3rd Floor, 1 Lyndhurst Terrace, Central, Hong Kong

Website: http://www.nur.hk/

Dining Info:

Date: 11^th September, 2015

Time: 8:00p.m. to 11:00p.m.

Meal: Dinner

Pax: 2

With: I. Ho

Price: HK$2,800
  - Food: HK$2,376 ( 2 x $1,188)

  - Beverage: HK$140

  - Service Charge: HK$251.6

Food and Comments:

Menu: Tasting Menu
Price: HK$1,188

餐廳係擺花街, 搭地鐵中環站出要行一段路仔(大約十分鍾)先上到黎...但又要行樓梯, 條街又窄, 大熱天時, 都咪話唔辛苦.

入到餐廳, 友人已坐低左, settle 好晒之後侍者就黎派menu (又係全宇宙食埋同一個menu既餐廳), 然後再一次好細心地問, 又冇對D咩食材敏感同有冇野唔鍾意食. 在下果刻其實係好想答佢...有! 在下對cheap野敏感, 一食cheap野就會即刻生野, 哈哈, 麻煩俾D魚子醬漱下口先~ 哈哈, just kidding~

然後奉上毛巾. 毛巾放係一舊石頭上, 又係果D卷到好細粒, 一加水會變大既毛巾, 友人好奇地問這是什麼, 在下其實好想答佢係前菜...用黎清清口腔, 請隨便~哈哈哈哈哈

而家每次見到呢種毛巾, 都會諗起"突"務madam套搞笑戲, 有冇人有共鳴??

望向附近隔離張大枱, 見到jeannie cho lee (係TVB拍過介紹品酒節目既侍酒師, 來頭都好大), 見到佢就等如好似派左粒定心丸-呢間餐廳衰極有個譜, master of wine wor....全球得果3百幾個, 佢一定唔會攞自己條脷黎較飛既~

主廚曾於丹麥全球第一餐廳NOMA做過, 不少菜式既賣相都帶左少許它的影子, 而裝修方面, 更加有8成相似, 勾起在下3年前係NOMA餐廳的美好回憶!


1^st Dish (Amuse Bouche)

原諒在下唔係太聽得到侍者介紹, 真係唔知係在下聽覺有問題定係因為侍者D口音.... 由左到右分別為parsley moose (moose 好light, 配埋塊脆脆, 幾refreshing, 幾好食), 蕃茄with cream cheese (not 100% sure係唔係cream cheese, 但粒蕃茄好甜, 好細心剝左皮), 右二忘記是什麼..., 跟住係青瓜菜式.

呢間餐廳其中一個賣點就係佢地有個露台, 種左好多herbs, 幾乎每道菜都放左D落去, 容易食得出既有tarragon, basil, mint... 但在下知道應該仲有好多...

2^nd Dish (Amuse Bouche) : Goose Leg and Goose Breast

好肥好薄既肉, 侍者話係鵝胸同鵝腿肉, 少少咸同幾油膩. 但其實唔係好食得出係鵝.... 

另外配左melon, 昆布, 同herbs...又係herbs... 一口肥肉一口配菜, 很不錯.

3^rd Dish (Amuse Bouche): Jasmine + Lemon Leaf

一shot綠色既飲品, 侍者話係茉莉花加檸檬葉, 但飲落好似人地果D五蔬汁...不過酸眯眯, 幾開胃, 同時可解上一道肥肉既油膩.

4^th Dish: King Crab (Pomelo, Lemon Basil)

餐牌上既第一道菜: 皇帝蟹, 蟹肉鮮甜, 帶有好少好少既海水咸味. 配埋帶微酸既柚子拆粒, 成件事好清新. 唯一想投訴既係...份量細左D...咁好食...就住就住食都只可以維持到3啖...

上面果幾塊又係herbs - 羅勒葉, 令賣相好睇左, 同時令成道菜既味道更豐富.

5^th Dish: Hamo (Fig, Goose Juice, Tarragon)

Hamo, 者係鰻魚, 唔太知佢點整 (侍者有講架, 但聽唔到嘛...) 在下估係slow cook, 因為食落質感唔似一般鰻魚, 佢好滑, 肉質好細緻, 但鰻魚既味道則十分鮮明. 配埋塊烤得香脆既鰻魚皮, 散發陣陣鰻魚味, Oishi! 

底下仲有一小片無花果. 而相中綠色細細條既又係herb - Tarragon 龍篙... sorry, 今次在下覺得唔係太夾...

6^th Dish: Girolle (Seeds, Sweet Corn & Parsley)

Girolle 係磨菇既一種, 好香好甜, 但重點係底下既配料, 一Pat類似risotto既野, 唔知係D咩既種子溝埋粟米, 配搭出另一種甜味.

7^th Dish: Hamachi (Watermelon, mint, lettuce)

油甘魚, 多數係食刺身, 今次係煙薰, 我估又係用herbs去煙的, 哈哈, 今次很不錯. 熟左既油甘魚冇想像中咁鞋 (可能本身呢隻魚都比較肥美, 魚油較豐富), 而陣煙味都冇掩過魚本身既味道. 估唔到咁夾咁好食, 友人都大讚. 

另外配上左個西瓜, 在下估用黎解下油煙味~上面係一D開心果既moose同開心果碎. 

零零舍舍加左條生菜....係幾好睇, 但...食落有D奇怪...唔明白... 

8^th Dish: Golden Egg (Marinated Taiyouran Egg, Legumes, Rocket)

醃溏心蛋, 蛋係Taiyouran Egg - 產自日本長崎的太陽蛋, 出名在佢呈橙色的濃郁蛋黃. 溏心蛋大家都食過, 呢隻比較蛋味香濃, 無論蛋白蛋黃, 質地都比街外食過的更柔滑, 猜想在溫度控制方面著實下了不少功夫. 

蛋下配有一塊zucchini, 同埋豆粒. 旁邊仲有D烤到脆一脆既脆絲...但唔記得係咩.. 

呢道菜係好食, 但原諒在下無辦法講一隻蛋可以講到好似其他食評咁天花龍鳳...始終係蛋一隻.

Bread

食到中段, 先上面包. 面包自家制, 怕大家食唔飽 (在下估係大廚都知自己整既野比較的骰, 怕大家食唔飽, 用黎頂一頂)...哈哈...講笑者. 很普通正常的面包.

9^th Dish: Mackerel (Wild Mackerel, Tomatoes, Garden Basil's)

鯖魚, 呢個鯖魚菜式係在下食過鯖魚以來, 最好食的一次. 侍者強調條鯖魚係今日下午剛剛從日本運到餐廳, 好新鮮咁話WOR. 

鯖魚不嬲唔係sell佢既滑身質感, 但佢既肉質比起平時食開既細緻嫰滑好多, 魚腥味也不會像平時食果D咁濃, 但郤保留左鯖魚本身應有既魚香. 塊皮燒過黎, 好香口. 

剝左皮既蕃茄, 又係甜到無論. 上面...又係herbs...Basil....食到呢道, 我已經忍唔住夾走晒佢地, 放係碟邊.

10^th Dish: Beef (Bbq'd Wagyu shoulder rib, black rice, Tokyo turnip)

燒日本和牛, 雖然所採用既部位不是好肥, 但都能夠保留絲絲和牛應有既香. 冇左入口即溶既感覺(唔會成口油), 換來了有質感既肉味. 

伴有黑米puree, 而最最最令人驚喜既係白蘿蔔, 好爽甜, 久違了日本白蘿蔔應有的味道. 另外配有白蘿蔔絲, 者係平時食壽司墊係紫穌葉下底果D. 當然, 呢度既級數唔同, 清甜好多. 老實說, 和牛吃過不少, 這裏做得雖不是最好, 但已算是不錯, 很高水平. 和牛, 終究要係日本食...  

11^th Dish (Dessert) : Peach (Yamanachi Peach, cashew, yuzu)

友人冇影相...山梨縣既梨, 略略煮熱後上面放左少少 edible flower. 碗裏既梨汁十分清甜, 但估計大廚係梨汁度加左D日本柚子, 嘗試平衡番個甜度, 而最後係成功既!

但最最最特別既係...佢個腰果布丁!!! 冇錯, 係平時食開果D腰果(當然係未炸過的). 係布丁上仲放左塊烤腰果既脆片. 味道好香, 好特別, 一試愛上! (其實味道幾似合桃露, 希望咁講冇整衰左成件事...哈)

12^th Dish (Dessert): Cherries (Pistachio, chai, roselle)

友人又係唔記得影相 (可能見到甜品太興奮, 忘記左相機先食...), 呢個甜品係一個開心果味既flour less 蛋糕做底 (大概2cm x 6cm), 上面放左幾粒切成一半既車厘子, 加埋三塊洛神花脆片, 蛋糕中央有一個紫穌葉雪糕. 

蛋糕無落面粉係唔同D, 少左果種鬆軟既質感, 但食落滲出淡淡既開心果味. 車厘子超甜, 估計係日本貨, 加埋塊好鬼清幽既洛神花脆脆, 好味道! 

至於個紫穌葉雪糕, 十分有驚喜, 紫穌葉....者係人地日本人食壽司用黎裝飾既果塊葉...在下知道愈來愈多人用呢種食材入饌, 比如有餐廳會用紫穌葉包住舊海膽去炸...但用黎整雪糕, 都係第一次聽. 但一放落口, 味道冇想像咁濃烈, 而且又同成個甜品夾到, 俾個讚大廚! (怕且D紫穌葉既原產地又係餐廳露台)

再一次強調, 呢間餐廳用herbs已經用到出神入化, 甚至有點走火入魔...

13^th Dish (Petit Four): Sorbet

一杯餐後咖啡埋尾, 餐廳也奉上petit four, 一個用朱古力包住既雪芭, 以為上面pat焦糖會好甜同漏到喊... 但出奇地light, 一陣冰涼口感, 喚醒番晒成個人, 好似發完一場好夢, 有人叫醒你~ 提你係時候埋單走人了~哈哈~

Wine: Sparkling Wine, Red Wine, Dessert Wine 

經理奉上了sparkling wine, 在下一向對泡泡酒未有硏究, 但感覺不錯. 同時又推介了一杯黎自西班牙既紅酒, match番道和牛菜式, 謝謝推介!

最後食甜品時, 又奉上了Dessert wine, 很不錯, 香得黎又不會太甜, 配山梨縣梨既甜品襯到一絕!

品酒, wine paring 呢家野, 在下還未在行, 希望他日有時間可以去進修一下, 將自己提昇到另一個層次. 不過, 在下一直有個問題想請教, 希望有人幫幫手解答: 究竟wine pairing, 係在下食完舊野, 跟住飲杯Wine, 定係在下咬到一半就飲呢~哈哈哈, 好無聊, 但請多多指教...

Overall Comments:

Food and Drink: 

食物味道其實的確很不錯, 好幾道菜都有驚喜: 皇帝蟹, 鰻魚, 鯖魚, 及甜品, 淨係以上幾道菜都值回票價. 食物味道同營養通常係魚與熊掌, 要好食既通常都係冇咩益...雖然呢度既主廚讀營養學, 亦將營養學融入每道所製作既菜式當中, 但難得不少菜式都烹調得十分可口, 或者, 呢D就係功力. 

但怎說也好, 既要走健康路線, 總會有代價付出, 或許其代價就係永遠唔會係呢間餐廳遇上鵝肝, pork belly (豬腩肉), 炸既野食...


Environment: 

餐廳裝修簡潔, 用左大量木既裝修, 俾人一種十分溫暖既感覺, 加上用左類似noma既枱凳, 成件事好北歐...哈... 加埋柔和既燈光, 好relaxing.

不過可能係星期五, 餐廳full house, 比想像中嘈左少少.

Service: 

餐廳經理係以前既在下做實習時既舊同事, 今次特別關照我地, 忙完晒過後又吹左兩嘴, 令成餐飯生色不少, 快樂是也.

唯一真係要改善既, 就係侍者既溝通能力, 也許是在下英文唔好, 聽唔慣accent, 但食飯既始終係在下, really sorry, 這就變了餐廳的責任, 佢地要確保客人聽得到聽得明每道菜既介紹.

一個嚴重扣分位, 有一位侍者有好輕微既口氣... 雖然係好輕微, 但務必注意...因為會影響到客人既食慾. 之後聽佢講解時, 在下都唔敢靠咁近, 從而更加聽唔清楚~哈~ 不要看少口氣這樣東西.

Worthiness: 

咁既質素,$1,200 per head, 的確好抵~ 加上又free左幾杯酒. 餐廳又十分有良心, 枝水都係收$70, 抵食指數爆燈.

9月11日~ 11號~ asia miles double左~ 又係最紅星期五, 匯豐信用卡11倍, 埋單$2,800, 咁就儲到3千幾4千miles~ 抵到爛!!!




估不到餐飯竟然又係食左三粒鍾! 友人十分滿意, 致於在下呢, 唔敢講100分滿足, 但遇上舊同事, 閒聊了一會, 所以都帶著快樂的心情離開餐廳. 

這間餐廳, 是十分值得一試, 至於會否再回來, 一定會, 但未必是可見的將來~

Rating: 

Food: 32.25/40
Environment: 27.25/30
Service: 25.75/30
Minus: -3 (侍者口氣)
Bonus: +5 (他鄉遇故知)

Total: 87.25/100
Ranking: B+
Come Back? May be